நபர்களை வலிந்து காணாமல் ஆக்குதல் என்னும் குற்றச்செயலை, அரசாங்கத் தரப்புகளோ படையினரோ உளவு நிறுவனங்களோ குழுக்களோ ஆயுதப் போராட்ட இயக்கங்களோ தனி நபர்களோ செய்யக்கூடும். அதற்கான ஆதாரங்கள் நேரடியாகவோ மறைமுகமாகவோ காணப்படலாம். எது எப்படியிருந்தாலும், காணாமல் ஆக்கப்பட்டோர் சார்ந்த விவகாரங்களைப் பாரபட்சமின்றி மனிதாபிமான அடிப்படையில் அணுகுவது அவசியம்.

இலங்கை அரச படைகளும் இலங்கை அரசுடன் இணைந்து செயற்பட்ட துணை இராணுவக் குழுக்களும் பல்லாயிரக்கணக்கானோரின் காணாமலாக்கப்பட்ட சம்பவங்களுடன் நேரடித் தொடர்பைக் கொண்டிருக்கின்றன.

ஒப்பீட்டளவில் எண்ணிக்கை வேறுபாடுகள் இருந்தாலும், காணாமல் ஆக்கப்படுதல் சார்ந்த சம்பவங்களுடன் ஆயுத ரீதியான போராட்ட இயக்கங்களும் நேரடித் தொடர்பைக் கொண்டிருந்தன என்பது மறுக்க முடியாத உண்மை. வெவ்வேறு இயக்கங்களுக்கு இடையிலும் இயக்கங்களுக்கு உள்ளேயும் ஏற்பட்ட முரண்பாடுகள் மற்றும் அதிகாரத் துஷ்பிரயோகச் செயற்பாடுகள், இயக்கங்களுக்கான கட்டாய ஆட்சேர்ப்பு நடவடிக்கைகள் போன்ற காரணங்களாலும் பலர் காணாமல் ஆக்கப்பட்டிருக்கிறார்கள் என்பது குறிப்பிடத்தக்கது. நேரடியாகவும் மறைமுகமாகவும் பாதிக்கப்பட்டவர்கள், மனித உரிமைகளுக்கான செயற்பாட்டாளர்கள், நீதித்துறை சார்ந்தவர்கள், விடுதலை அரசியல் சார்ந்து செயற்பட முனைவோர் போன்ற அனைத்துத் தரப்பினரும், இத்தகைய விடயங்களிலும் கவனம் செலுத்த வேண்டியுள்ளது. //