பிரபாகரனின் திருமணத்திற்கு முன்னதாக விடுதலைப் புலிகள் இயக்கத்திற்குள்ளே காதல் மற்றும் திருமணம் ஆகியவை அனுமதிக்கப்பட்டிருக்கவில்லை. இத்தகைய பின்னணியில், அவரது சடுதியான திருமண ஏற்பாட்டைத் தொடர்ந்து சில போராளிகள் மத்தியில் வாதப்பிரதிவாதங்கள் எழுந்தன. பெரும்பாலான போராளிகள் அந்தத் திருமணத்தை வரவேற்றார்கள். இனி வருங்காலத்திலே தாமும் காதலிக்கலாம் அல்லது திருமணம் செய்துகொள்ளலாம் என்று அவர்கள் மகிழ்ச்சியடைந்திருக்க முடியும். 

‘நாம் தமிழர் கட்சி’ ஒருங்கிணைப்பாளர் சீமான் அவர்கள், விடுதலைப் புலிகள் இயக்கம் மற்றும் பிரபாகரன் சார்ந்த விடயங்களையும் அடையாளங்களையும் சுயலாப அரசியல் உள்நோக்கங்களுடன் தமிழ்நாட்டிலே தவறாகப் பயன்படுத்திவருகிறார். தனது ஈழப் பயணம் சார்ந்து மிகைப்படுத்திய, இட்டுக்கட்டிய, பொய்யான தகவல்களை அவர் தொடர்ந்தும் சொல்லிவருகிறார். சில உண்மைகளோடு பொய்களைக் கலந்துகட்டித் திரும்பத்திரும்ப அவர் பேசுவதால் பொய்களையும் உண்மைகள் என்று சிலர் நம்பக்கூடும். ஆனால், அவரது பொய்கள் எப்போதும் பொய்களே.

 

சீமானின் ஈழப் பயணம் சார்ந்த விடயங்கள் பலவற்றை நேரடியாக அறிந்த ஒருவராக, அப் பயணக் காலத்தில் அவரை ஒளிப்படங்களிற் பதிவுசெய்தவராக, சீமானுடைய போலித்தனங்கள் சிலவற்றையும் தவறுகளையும் பொதுவெளியில் அம்பலப்படுத்தியிருக்கிறேன். 

 

‘எல்லாளன்’ திரைப்படத்தின் படப்பிடிப்புத் தளத்தில் ஆயுதங்களுடன் சீமான் இருப்பது போல நான் உருவாக்கியிருந்த ஒளிப்படங்களை, விடுதலைப் புலிகள் இயக்கம் சீமானுக்குப் பயிற்சி வழங்கியபோது உருவாக்கப்பட்டவை என்று பொய் சொல்லி நாம் தமிழர் கட்சியினர் பரப்பியிருக்கிறார்கள். பொதுவெளியில் ஆதாரபூர்வமாக அது பற்றி நான் பேசியதால் அந்த ‘ஊழல்’ அல்லது மோசடி அம்பலமானது. அந்த மோசடிக்காக இதுவரை சீமானோ அவரது கட்சி சார்ந்த எவருமோ வருத்தம் தெரிவிக்கவில்லை; மன்னிப்புக் கோரவும் இல்லை. 

 

பிரபாகரனைச் சந்தித்த பின்னர், ‘எல்லாளன்’ திரைப்படப் படப்பிடிப்புத் தளத்தில் 2008-02-15 அன்று சீமான் என்னைச் சந்தித்திருந்தார். அன்றுதான் ஆயுதங்களுடன் அவர் இருப்பது போன்ற ஒளிப்படங்களை அவரது விருப்பத்திற்கேற்ப உருவாக்கியிருந்தேன். அதைத் தொடர்ந்து, வேறு இடத்தில் நிர்மாணிக்கப்பட்டிருந்த ‘எல்லாளன்’ படப்பிடிப்புத் தளத்தில் 2008-02-17 அன்று எறிகணை வீழ்ந்து வெடித்ததில், லெப். கேணல் தவா அவர்களுடன் மேஜர் புகழ்மாறன் அவர்களும் வேறு இருவரும் தியாகச்சாவு அடைந்தனர். அதன் பின்னர் சீமான் வன்னியிலே தங்கியிருப்பதற்கான அவசியம் இருக்கவில்லை. வேறு இடங்களில் நிகழ்ந்த விமானத் தாக்குதல்கள் மற்றும் உயிரிழப்புகள் போன்றவற்றை அறிந்து எப்போதும் பயந்த நிலையிலேயே இருந்தார். (சீமானுடன் அங்கு தங்கியிருந்த, திரு. சந்தோஸ், திரு. முருகன், திரு. நந்து ஆகியோர் சீமானின் பயத்தை நேரடியாகவே நன்கு அறிந்திருக்கிறார்கள். தமிழ்நாட்டைச் சேர்ந்த அவர்கள், ‘எல்லாளன்’ திரைப்பட உருவாக்கத்திற்காக வன்னிக்கு வந்திருந்தார்கள்.) 

 

வன்னியில் அறியப்பட்ட சீமானின் சில நடத்தைகள், அவர் மீதான அதிருப்திகளைக் கூட்டின. தொடர்ந்தும் அவர் அங்கிருப்பதை எவரும் விரும்பியிருக்காத நிலையில், அவரது விசா செல்லுபடிக் காலம் நீடிக்கப்படாமலே அவர் வன்னியில் இருந்து இரண்டாவது வார நிறைவில் வெளியேற்றப்பட்டிருந்தார். 

 

நேர்காணல்களில் அவரே சொல்லியிருப்பது போல ஒரு மாதம் அவர் வன்னிக்குள் இருக்கவில்லை. அது மட்டுமல்ல, தியாகச்சாவடைந்த புகழ்மாறன், தனது பாதுகாப்புக்கு நியமிக்கப்பட்டிருந்ததாகப் பொய் சொல்லிவருகிறார். உண்மையில், ‘எல்லாளன்’ திரைப்படத்தின் பிரதான பாத்திரமேற்று நடித்துக்கொண்டிருந்த போராளிதான் புகழ்மாறன். அவருக்கும் சீமானுக்கும் எந்தத் தொடர்பும் இருக்கவில்லை. அப்போது சீமான் தங்கியிருந்த கிளிநொச்சிப் பகுதியில், தனிப்பட்ட பாதுகாப்பாளர்களை அவருக்காக நியமித்திருக்க வேண்டிய அவசியம் இருக்கவில்லை. அவருக்கும், அப்போது ‘எல்லாளன்’ திரைப்பட உருவாக்கத்திலே பங்களித்துக்கொண்டிருந்த தமிழ்நாட்டவர்களுக்கும் பொதுவாக உதவியாளர்கள் இருந்தார்கள். 

 

சீமான், பிரபாகரனைச் சந்தித்தபோது உருவாக்கப்பட்டிருந்த ஒளிப்படங்கள் அவருக்கு நேரடியாக வழங்கப்பட்டிருக்கவில்லை. அவர் தமிழ்நாட்டுக்குத் திரும்பியதும் அவற்றைப் பெறுவதற்குப் பல்வேறு முயற்சிகளை மேற்கொண்டு தோற்றுப்போயிருந்தார். சீமானால் அவை தவறாகப் பயன்படுத்தப்படலாம் என்னும் எச்சரிக்கை உணர்வு, விடுதலைப் புலிகள் இயக்கம் சார்ந்தவர்களிடம் பொதுவாக இருந்திருக்கிறது. 

 

நெருக்கமாகப் பழகியிருக்காத எவரையும் இலகுவில் நம்பிவிடாத பிரபாகரன், எதன் பொருட்டும் சீமானை நம்பியிருக்கச் சாத்தியமில்லை. ஆனால், சில தேவைகளுக்காக சீமானைப் பயன்படுத்திக்கொள்ளும் நோக்கம், பிரபாகரன் உட்பட விடுதலைப் புலிகள் இயக்கம் சார்ந்தவர்களுக்கு இருந்திருக்கக்கூடும். 

 

பொதுவாக நோக்கும்போது சீமானைக் கையாண்ட விதத்திலும் அவரை அணுகிய முறையிலும் விடுதலைப் புலிகள் இயக்கம் சார்ந்தவர்கள் தவறிழைத்திருக்கிறார்கள் என்று தோன்றுகிறது. பிரபாகரன் தனது ‘மண்டையைக் கழுவி’ அனுப்பியதாக, இப்போது சீமான் சொல்லக்கூடிய ‘அவல நிலை’ உருவாகியிருக்கிறது. சீமான் சொல்லிக்கொள்வது போல, சீமானுக்குப் பிரபாகரன் பயிற்சி கொடுத்து உசுப்பேற்றி அனுப்பியிருந்தால், பிரபாகரன் செய்த வரலாற்றுத் தவறுகளில் ஒன்றாகவே அது இருக்கும்.

 

சீமானைப் பொறுத்தவரையில், பிரபாகரனின் முழு நம்பிக்கை பெற்று அவருக்கு அடுத்த நிலையில் இருக்கும் தலைவராகத் தன்னை வலிந்து காண்பிக்க முனைகிறார். மட்டுமல்ல, தமிழ்த் தேசியத்தின் தனி உரிமையாளராகவும் ‘நாம் தமிழர் கட்சி’ சார்ந்து தன்னைக் கட்டமைக்க விழைகிறார். தமிழ்நாட்டிலே தமிழ்த் தேசிய அரசியலை முற்போக்கான  திசையில் எந்தக் கட்சிகளும் இயக்கங்களும் முன்னெடுக்க முடியும்.

 

பிரபாகரன் மீது எனக்கு விமர்சனங்கள் இருந்தாலும் அவருடன் நெருங்கிப் பழகியவன் என்ற முறையில் அவரது நல்ல பண்புகளை நன்கு அறிவேன். அவர், சீமானைப் போல கோமாளித்தனங்களும் குளறுபடிகளும் நிறைந்த அரசியல்வாதியல்ல; அர்ப்பணிப்பு உணர்வுடன் தியாக வாழ்வில் இருந்த போராளி. 

 

சீமான் தமிழ்நாட்டுக்குத் திரும்பிய பின்னர், விடுதலைப் புலிகள் இயக்கத்துடன் நேரடித் தொடர்பில் இருக்கவில்லை. நெருக்கமான தொடர்பில் இருந்திருந்தால் வன்னியில் உருவாக்கப்பட்ட ஒளிப்படங்களை அவரால் எப்படியாவது பெற்றிருக்க முடியும். இதன் அர்த்தம், வி. பு. இயக்கம் சீமானை எதற்காகவும் நம்பியிருக்கவில்லை என்பதுதான். அவர் வாய்ப்பேச்சில் மட்டும் வல்லவராக இருந்த அக் காலத்தில், விடுதலைச் சிறுத்தைகள் கட்சியைச் சேர்ந்த வன்னியரசு அவர்களும் வேறு சிலரும் பல்வேறு நெருக்கடிகளுக்கு மத்தியில் வி. பு. இயக்கத்திற்கான உதவிப் பணிகளை அர்ப்பணிப்பு உணர்வுடன் செய்துகொண்டிருந்தார்கள். வன்னியரசு, வன்னிக்கு வந்திருந்த ஒரு சந்தர்ப்பத்தில் அவரையும் சந்திக்க முடிந்திருக்கிறது. 

 

 

சீமானின் ஈழப் பயணம் சார்ந்த குளறுபடிகள் மற்றும் மறைக்கப்பட்ட உண்மைகள் தொடர்பாக எனக்குத் தெரிந்த அனைத்தையும் இன்னும் பொதுவெளியில் நான் பேசிவிடவில்லை. 

 

இந்திய அரச இயந்திரத்தின் வரையறைகளை மீறிச் செயற்பட முடியாத ஒரு மாநில முதலமைச்சர் பதவியை அடைவதற்காக வெறுப்பரசியலை விதைத்துக்கொண்டிருக்கும் சீமான், ஈழத்தமிழர்களின் விடுதலை அரசியல் சார்ந்து பெரிதாக எதையாவது சாதித்துவிடுவாரென்று யாராவது நம்பினால், அவர்கள் முட்டாள்களாகவோ ஏமாளிகளாகவோ இருக்க வேண்டும். 

 

பல்வேறு காரணங்களாலும் தமக்குள்ளே பிளவுபட்டுக் கிடக்கும் ஈழத்தமிழரிடையே நிலவக்கூடிய அறியாமைகளையும் இயலாமைகளையும் கண்மூடித்தனமான நம்பிக்கைகளையும் துயரங்களையும், சீமான் தந்திரமாகப் பயன்படுத்திக்கொண்டிருக்கிறார். 

 

சீமானைப் போல, திருமாவளவனோ வேறு எவருமோ பிரபாகரன் மற்றும் விடுதலைப் புலிகள் இயக்கம் சார்ந்து தவறான அல்லது திரிபான தகவல்களை வெளிப்படுத்தக்கூடிய அரசியல்வாதிகளாக அறியப்பட்டுவிடக் கூடாது என்னும் கரிசனம், பொதுவாகத் தமிழர்கள் மத்தியில் இருக்கிறது. 

பூகோள அரசியல் இழிவுகளாலும் உள்ளக முரண்களாலும் அழிந்துபோய்விட்ட விடுதலைப் புலிகள் இயக்கத்தையும் அதன் தலைவர் பிரபாகரனையும் உள்ளபடியே புரிந்துகொள்ளாமல், மிகைப்படுத்தல்களோடும் திரிபுவாதங்களோடும் பலரும் புரிந்துகொள்ள முற்படுகிறார்கள். தமிழ்நாட்டிலும் ஈழத்திலும் செயற்படுகிற அரசியல்வாதிகள் மற்றும் தமிழ்த் தேசியச் செயற்பாட்டாளர்கள் பலருக்கும் இத்தகைய புரிதற் கோளாறு தாராளமாகவே இருக்கிறது. 

 

ஈழ விடுதலைப் போராட்டம் சார்ந்த விடயங்களையும் அவை சார்ந்த வெகுமக்கள் உணர்வுகளையும், சுய நலன்களுக்காகவும் அடையாள அரசியல் சார் நலன்களுக்காகவும் தவறாகப் பயன்படுத்திக்கொண்டே இருக்கும் அரசியல்வாதிகளால் அறவழிப்பட்ட நல்ல தலைவர்களாகப் பரிணமிக்க முடியாது.

 

***